Hinir árlegu hausttónleikar mínir verða haldnir í GAMLA BÍÓ ( Íslensku Óperunni ) eins og undanfarin ár. Þetta er 26. árið í röð sem ég held þessa tónleika og eru þeir orðnir fastur liður í menningarlífi Reykjavíkur og víða í bæjarfélögum í kringum landið. Aðsókn að þessum tónleikum er orðin mikil og hægt verður að panta sér miða á tónleikana hér á heimasíðunni frá og með 8.ágúst. Því miður er ekki hægt að hafa númeraða miða.

Þakka ykkur öllum sem senduð inn tillögur um söngva á væntanlegan geisladisk. Þetta hefur verið vinna mín undanfarið að velja og hafna og raða saman á diskinn. Þessari undirbúningvinnu er lokið og nú er unnið í hljóðveri að koma herlegheitunum saman og hanna umbúðir. Yfirumsjón hljóðvinnslu er í höndum Vilhjálms Guðjónssonar. Hönnuður hefur ennþá ekki verið ráðinn, en nokkrir koma til greina, og er verið að vinna í þeim málum þessa daga.Það verður EDDA miðlun og útgáfa, sem gefur út diskinn í samvinnu við mig.

Nú í apríllok 2003 hef ég lokið velheppnaðri tónleikaferð um land allt. Því miður komst ég ekki á alla þá staði þar sem fólk bað mig um að koma á með tónleikana. Ástæðan er að ég var aðeins einn mánuð hérlendis. En 28 tónleikar á 26 dögum telst ágætt.

Þá er hún loksins komin á markaðinn platan sem margir hafa beðið eftir. BERGMÁL heitir platan með úrvali söngva Harðar Torfa. Á þessari plötu er að finna 14. af þekktari söngvum hans auk tveggja nýrra. Það gefur auga leið að eftir jafn langan og gæfuríkan feril þá rúmast ekki allir bestu söngvar Harðar Torfa á einni plötu og þessi því aðeins sú fyrsta af þremur. Þessi plata er kjörin fyrir þá sem lítt eða ekkert þekkja til verka Harðar því hún gefur góða innsýn inn í hugarheim hans, lífsviðhorf, efnistök og stíl.